UID tibi vana suos offert mea bulla timores? Quid facit ad vestrum pondus inane meum?
Expectat nostros humeros toga fortior;
En mea bulla, lares en tua dextera mihi.
Quid tu? quæ nova machina,
Quæ tam fortuito globo
In vitam properas brevem?
Qualis virgineos adhuc
Cypris concutiens sinus,
Cypris jam nova, jam recens,
Et spumis media in suis,
Promsit purpureum latus ;
Concha de patria micas,
Pulchroque exsilis impetu ;
Statim et millibus ebria
Ducens terga coloribus
Evolvis tumidos sinus
Sphæra plena volubili.
Cujus per varium latus,
Cujus per teretem globum
Iris lubrica cursitans
Centum per species vagas,
Et picti facies chori
Circum regnat, et undique,
Et se Diva volatilis
Jucundo levis impetu
Et vertigine perfida
Lasciva sequitur fuga
Et pulchre dubitat; fluit
Tam fallax toties novis,
Tot se per reduces vias,
Erroresque reciprocos
Spargit vena coloribus ;
Et pompa natat ebria.
Tali militia micans
Agmen se rude dividit ;
Campis quippe volantibus,
Et campi levis æquore
Ordo insanus obambulans
Passim se fugit, et fugat.
Passim perdit, et invenit.
Pulchrum spargitur hic Chaos.
Hic viva, hic vaga flumina
Ripa non propria meant,
Sed miscent socias vias,
Communique sub alveo
Stipant delicias suas.
Quarum proximitas vaga
Tam discrimine lubrico,
Tam subtilibus arguit
Juncturam tenuem notis,
Pompa ut florida nullibi
Sinceras habeat vias;
Nec vultu nitent suo.
Sed dulcis cumulus novos
Miscens purpureus sinus
Flagrant divitiis suis,
Privatum renuens jubar.
Floris diluvio vagi,
Floris sidere publico
Late ver subit aureum,
Atque effunditur in suæ
Vires undique copiæ.
Nempe omnis quia cernitur,
Nullus cernitur hic color,
Et vicinia contumax
Allidit species vagas. Illic contiguis aquis Marcent pallidulæ faces. Unde hic vena tenellulæ, Flammis ebria proximis Discit purpureas vias, Et rubro salit alveo. Ostri sanguineum jubar Lambunt lactea flumina ; Suasu cærulei maris Mansuescit seges aurea; Et lucis faciles genæ Vanas ad nebulas stupent ; Subque avis rubicundulis
Flagrant sobria lilia.
Vicinis adeo rosis
Vicinæ invigilant nives,
Ut sint et nives rosæ,
Ut sint et rosæ nives;
Accenduntque rosæ nives,
Extinguuntque nives rosas.
Illic cum viridi rubet,
Hic et cum rutile viret
Lascivi facies chori.
Et quicquid rota lubrica
Caudæ stelligeræ notat,
Pulchrum pergit et in ambitum.
Hic cœli implicitus labor,
Orbes orbibus obvii;
grex velleris aurei
Grex pellucidus ætheris;
Qui noctis nigra pascua
Puris morsibus atterit;
Hic quicquid nitidum et vagum
Coeli vibrat arenula
Dulci pingitur in joco.
Hic mundus tener impedit
Sese amplexibus in suis.
Succinctique sinu globi
Errat per proprium decus.
Hic nictant subitæ faces,
Et ludunt tremulum diem.
Mox se surripiunt sui et
Quærunt tecta supercili;
Atque abdunt petulans jubar,
Subsiduntque proterviter.
Atque hæc omnia quam brevis
Sunt mendacia machinæ !
Currunt scilicet omnia
Sphæra, non vitrea quidem,
Ut quondam Siculus globus,
Sed vitro nitida magis,
Sed vitro fragili magis,
Et vitro vitrea magis.
Sum venti ingenium breve
Flos sum, scilicet, aëris ;
Sidus scilicet æquoris;
Naturæ jocus aureus,
Naturæ vaga fabula,
Naturæ breve somnium.
Nugarum decus et dolor;
Dulcis, doctaque vanitas.
Auræ filia perfidæ ;
Et risus facilis parens.
Tantum gutta superbior,
Fortunatius et lutum.
Sum fluxæ pretium spei; Una ex Hesperidum insulis. Formæ pyxis, amantium Clare cæcus ocellulus; Vanæ et cor leve gloriæ.
Sum cæcæ speculum Deæ,
Sum Fortunæ ego tessera,
|