"And yours was gude and gude eneuch,
But nae sae gude as mine,
For yours was o' the gude red gold,
But mine o' diamond fine.

So open the door now, Love Gregòr, And open it wi' speed,

Or your young son that's in my arms For cauld will soon be dead."

"Awa', awa', ye ill woman,
Gae frae my door for shame,
For I hae gotten another love,
Sae ye may hie ye hame.'

"O hae ye gotten another love,
For a' the oaths ye sware?
Then fare ye well now, fause Gregòr,
Ye'se never see me mair."

O hooly, hooly gaed she back,
As the day began to peep,
She set her foot on good ship-board,
And sair, sair did she weep.

"Tak doun, tak doun that mast o' goud,

Set up the mast o' tree;

Ill sets it a forsaken ladie
To sail so gallantlie.

"Tak down, tak down the sails o' silk,

Set up the sails o' skin;

Ill sets the outside to be gay

When there's sic grief within."

Love Gregor started frae his sleep,
And to his mother did say,

"I dreamt a dream this night, mither,
That makes my heart right wae.

"I dreamt that Annie o' Lochroyan,
The flower of a' her kin,

Was standing mournin' at my door,
And nane wad let her in."

"There was a woman at the door,
Wi' a bairnie in her arm,
But I wadna let her ben the house
For fear she'd do thee harm.'

O quickly, quickly raise he up,

And fast, fast ran to the stran', And there he saw his fair Annie Fast sailin' from the lan'.

And "Heigh, Annie," and "Ho, Annie, O Annie, winna ye bide?"

But

aye

the louder he cried "Annie"

The louder roared the tide.

And "Heigh, Annie," and "Ho, Annie,

O Annie, speak to me;"

But aye the louder he cried "Annie,"
The louder roared the sea.

The wind grew loud, the sea grew rough,
The ship was rent in twain,

And soon he saw her, fair Annie,
Come floating o'er the main.

He saw his young son in her arms,
Baith tossed above the tide,

He wrung his hands, and fast he ran,
And plunged in the sea sae wide.

He caught her by the yellow hair,
And drew her to the strand,
But cauld and stiff was every limb
Before he reached the land.

Oh! first he kissed her bonnie cheek,
And syne he kissed her chin,
And sair he kissed her bonnie lips,
But there was nae breath within.

Oh, he has mourned for fair Annie
Till the sun again went down,
Syne wi' a sich his heart it brast,
And his soul to heaven has flown.

BINNORIE.

Published in Jamieson's Collection, and in Scott's Border Minstrelsy. Scott seems to have touched without improving Jamieson's version. Such lines as

"A famous harper, passing by,

The sweet fair face chanced to espy,"

are not to be compared in vigour to the original minstrel's

"By there cam' a harper fine,

That harped to the king at dine;"

and the phrase in which the first author says of the weird harp

"The harp untouched to the windes rang,
And sad and doleful was the sang,"

are infinitely preferable to such a bald modernism as—

"The strings he formed of her yellow hair,
Whose notes made sad the listening ear."

THERE were twa sisters lived in a bower,
Binnorie, O Binnorie!

There came a knicht to be their wooer
By the bonnie mill-dams o' Binnorie.

He courted the eldest wi' glove and ring,
Binnorie, O Binnorie!

But he loved the youngest aboon a' thing,
By the bonnie mill-dams o' Binnorie.

He courted the eldest wi' broach and knife;
Binnorie, O Binnorie!

But he loved the youngest as his life,
By the bonnie mill-dams o' Binnorie.

The eldest she was vexèd sair,
Binnorie, O Binnorie!

And sair envièd her sister fair,

By the bonnie mill-dams o' Binnorie.

Intil her bower she couldna rest,
Binnorie, O Binnorie!

Wi' grief and spite she maistly brast,
By the bonnie mill-dams o' Binnorie.

Upon a mornin' fair and clear,
Binnorie, O Binnorie!

She cried upon her sister dear

By the bonnie mill-dams o' Binnorie.

O sister come to the sea-strand,
Binnorie, O Binnorie!

And see our father's ships come to land,
By the bonnie mill-dams o' Binnorie.

She's ta'en her by the milk-white hand,
Binnorie, O Binnorie!

And led her down to yon sea-strand
By the bonnie mill-dams o' Binnorie.

The youngest stood upon a stane,
Binnorie, O Binnorie!

The eldest cam and threw her in,
By the bonnie mill-dams o' Binnorie.

She took her by the middle sma',
Binnorie, O Binnorie!

And dashed her bonnie back to ja'
By the bonnie mill-dams o' Binnorie.

"O sister, sister, tak my hand,
Binnorie, O Binnorie!

And I'se mak ye heir to a' my land,
By the bonnie mill-dams o' Binnorie.

"O sister, sister, save my life,

Binnorie, O Binnorie!

And I'll swear I'se never be nae man's wife, By the bonnie mill-dams o' Binnorie."

"Foul fa' the hand that I should tak, Binnorie, O Binnorie!

It twined me o' my warld's mak,

By the bonnie mill-dams o' Binnorie.

"Your cherry cheek and yellow hair, Binnorie, O Binnorie!

Gar me gang maiden for evermair,

By the bonnie mill-dams o' Binnorie."